وداعا اصدقائي .. وحتى إشعارٍ آخر

حسن المهندس ……

طبعا آني دائماً متفائل واشعر بالأمل .. وأصدقائي يعرفوني

لكن الظاهر وصلت حدها .. ولهنا وكافي بعد .. وللصبر حدود

 أول البارحة هزة أرضية بالعمارة   وهيئة الأنواء الجوية والرصد الزلزالي تحذر ..

حكومة ماكو وراتب مهدد .. ولاحگنا كورونا المستجد .. والجراد المحتشد .. وما بين ترامب المستبد .. والمقاوم المستعد .. منعرف منو راح يستشهد ..

والنفط راح بالرجلين .. وجسر السنك مسدود .. والبلد حيله مهدود

 كريستيانو طفر للبرتغال .. وميسي لا حس ولا خبر ..

والمهاجمين كلهم رجعوا للدفاع .. والدفاع مالتنا والداخلية .. يشتغلون مراقب خط ميگدر حتى يشهر كارت أصفر بوجه ذاك الطرف .. عديم الشرف .. المستمر بالقتل والخطف  ..

 العالم كله داخل إنذار مشدد .. والكرة الأرضية واگفه تك رجل وترجف .. مو بسبب كورونا .. لا لا .. بسبب الكوكب الجاي بالطريق من مجرة الحظ الأسود .. ويريد يضربنا ..

ويقال .. أن هذا الكوكب المنفلت متجه عدل وگبل على محافظة الحلة .. وبالذات على بيت ( محمد وناس ) ..

ولمن لا يعلم .. قبل يومين صديقنا وناس .. وعبر صفحته الرسمية .. وجه نداء إستغاثة عاجل الى الرئيس الكوري ابو لغد .. وتبرع له بقطعة أرض مسكنه الشخصي لإجراء تجارب نووية مجاناً وبدون مقابل ..

لذلك أحب ابشر – صديقي الحلاوي – واگوله جاك الفرج من المجرة ..

والله لا يعوزك لكوريا الشمالية ولا لقائدها الضرورة ..

ارجو المعذرة إخواني .. أول مرة اشوف نفسي أخرج على النص والمنطق .. واكون بهذا التشاؤم واليأس من هذا البلد ..

الحكومة دزت على السفير الأمريكي بالعراق .. حتى يرزلهم على الخاص بسبب التراشق الكاتيوشي .. وميحرجهم على العام 

 لكن ما أعرف ليش السنة ساكتين على الشيعة .. وعايفيهم يتقاسمون المناصب بيناتهم .. بينما هم مهمشون  ؟؟

 وما أدري ليش الشيعة منطين أهمية للسنة .. بينما يگدرون يطيروهم بنفخة وحده ؟؟

 ومستعد أقسم لكم .. آني شخصيا سمعت سنة يحچون على الشيعة .. وسمعت بإذني شيعة يحچون على السنة .. وكل طرف يگول هذولي ميشمون ريحة الجنة لأن متصيرلهم جارة .. لو يطلع عادل إمام من گبره .. 

 والعجيب هذولي عدهم مفخخات ممكن يرجعوها .. وهذولاك عدهم بطات ممكن يشغلوها .. يا أخي المن ظاميهن ؟؟ واشـ منتظرين  ؟؟

لو عاجبكم الطرف الكوردي يتفرج عليكم ويستغل تناقضاتكم وخلافاتكم ؟؟

 لو هذولي خطية المساكين المسيح والتركمان والصابئة والأيزيدية والشبك .. ولا أحد معبرهم لأن ما عدهم ميليشيات ولا مدعومين إقليميا .. وما اعرف ليش گاعدين وساكتين .. واشوكت يتحركون ؟؟

 واللي يكتلك العشاير هم سكتة صار كم يوم .. لا عركات ولا قاذفات ولا تبادل هاونات  ؟؟ هيج كورونا صگرهم ؟؟  هيج يخوف أكثر من القانون .. وأكثر من العشائر المجاورة والمعادية  ؟؟

 عزيزي المواطن : حتى لو ردت تتفاءل .. وتفترض الخلاص من كل هاي المشاكل  .. ممكن بكل بساطة ترجع سالفة سد الموصل مثلا .. لو نسيتها ؟؟

الله وكيلكم .. بوكتها حتى فكرت أشتري زورق مطاطي .. حتى ينقذنا من موجات إنهيارالسد اللي ممكن تجرفنا واحنة نايمين بالليل ..

 ويا ويلكم إذا – الأرملة السوداء – بعدها بدون زواج  ؟؟

 ويا ويلكم إذا سيد دخيل تخلى عنا وتركنا للحية مالته ؟؟

وأكيد أهل واسط ما ناسين – حية سيد دخيل – داخلين على بخته !!

 لكل هذا وغيره أخواني .. مضطر اسحب ترشيحي من الفيس بوك .. على أمل أن نلتقيكم من تفرج إن شاء الله .. وابرونا الذمة متفضلين ..

وكونوا على ثقة  : أي واحد اشوفه متفائل اليوم .. ما يلوم الا نفسه ؟؟

واحظره لو يصير مرشح برهم صالح ..

وإذا ما أهفه بلوك .. أعزمه على تشريب خفاش بري ..

ودمتم مكممين ..